MOTIBO NAN CU UN MUCHA OF HOBEN TA ACUDI NA DROGA
FADA - News

MOTIBO NAN CU UN MUCHA OF HOBEN TA ACUDI NA DROGA

Hopi biaha nos por mira den medio nan di comunicacion, hoben nan cu ta comete delito nan di ladronicia, atraco, violencia contra familiar nan, of cu ta involucra den problema nan di reglamento di cuenta door di ta pertenece na gang.

Tambe Cuerpo Policial di Aruba ta atende varios asistencia pa hoben nan cu ta afilia na secta nan satanico of secta nan cu ta uza marihuana.

Ta facil pa zundra e hoben nan, educador nan y hasta gobernacion di un pais pa motibo di e echo nan ki, pero ta bon pa para keto y pensa cual ta e motibo nan cu por conduci e hoben nan aki na e tipo di  conducta nan ya menciona.


 

E hoben den fase di pubertad of adolescencia , na momento di pasa den un etapa di crisis y pa purba di huy di e problema nan ta busca salida nan facil of forma nan di lubida e problema nan aki door di acudi na alcohol y otro droga nan.

ADICCION na droga nan hopi biaha por tuma luga pa e siguiente motibo nan:

  1. A) PROBLEMA NAN FAMILIAR

  1. Falta di comprension door di mayor nan of representante nan
  2. Falta di comunicacion door di mayor nan of reprentante nan
  3. Maltrato fisico y verbal den e hogar  ( mayor nan na yiu, mayor nan un na otro)
  4. Rechaso di parti di mayor nan of representante nan
  5. Presencia di padrastro of madrastra den e hogar (yiu nan cu no por accepta e separacion di nan mayor nan y ta haya falta di mama of e tata den e hogar
  6. Proceso di divorcio di mayor nan
  7. Abandono door di mayor nan
  8. Un of ambos mayor ta adicto
  9. Falta di amor y atencion di parti di e mayor nan den e hogar (mayor nan mucho ocupa complaciendo amigo (a) nan of kisas demasiado ocupa cu happy hours).

10) Abuso sexual den seno familiar

Hoben nan, buscando e solucion pa nan conflicto nan, ta cay den e eror di uso di droga nan, pensando cu nan lo uza e substancia un biaha so.

Pero despues esaki ta comberti den un custumber of adiccion.

Esaki ta ocasiona un crecemento di problema nan familiar pa motibo cu e droga ta tuma control di e hoben y ta bira mas fuerte cune.

Na momento cu no por of no kier laga e droga e hoben ta dicidi pa bandona e hogar y ta converti nan mes den adicto nan ambulante (choller nan) y caminda cu nan ta expone nan mes di wordo contagia cu enfermedad nan, ser golpia of soporta abuso, hamber y abandono

Mientras e droga ta haciendo efecto, esey lo ta e tempo tambe cu e ta sinti e sin e problema nan, pero despues e ta confronta cu e realidad atrobe.

Otro factor cu ta hiba e hoben of mucha na uzo di droga ta:

 

  1. B) CURIOSIDAD
  2. Den algun ocasion hoben nan cu un curiosidad asina grandi ta observa cu algun hoben di nan edad ta imita e acto di purba y sinti e uzo di cualkier droga y ta haci mescos.
  3. Door di e propaganda di e droga (producto)  cu ta ser haci na e mucha nan  y hoben nan door di propio amigo(a), colega di school of bendedo nan ta lanta e curiosidad cerca nan.

 

  1. C) PEER PRESSURE

E grupo di amigo(a) ta exigi pa bo uza droga cu nan pa bo por ser acepta den e grupo.

Comentario di FADA: Uzado nan of adicto nan por haci e comentario cu nan kier ariba esunnan cu no ta dispuesto pa uza droga. E hoben nan mester ser consciente di nan mes y mantene nan posicion di bisa NO.

Hoben nan of mucha nan mester cuida nan mes of abstene (hala leu) di amistad nan cu ta insisti pa nan uza droga.  Por yega asina leu cu e supuesto amigo (a) por spera e momento indica pa pone e droga den bo bebida of cuminda.

Tambe amigo (a) nan cu ta uzado nan caba hopi biaha ta forma parti di e ola di delincuencia, kibrando den cas nan di hende pa horta, no pa motibo di hamber sino pa e necesidad pa haya placa pa sigui droga nan mes. Pesey ta bon pa scoge e amistad nan corecto.

  1. D) PROBLEMA NAN EMOCIONAL
  1. Rabia y sentimento di vengansa door di comportacion di mayor nan, amigo (a)  nan of conoci nan
  2. Dificultad pa siña
  3. Rabia door di wordo yama inutil of bestia door di propio mayor nan
  4. Kiebro di matrimonio of relacion amoroso
  5. Fayecimento di un ser keri

Problema nan generalmente ta ocasiona depresion, sentimento nan di culpa. Autoestima abou, huymento pa e realidad, arogancia.

Nan ta pensa cu nan ta e causante di e problema nan y ta acudi na tabaco, alcohol y otro droga nan, pensando asina  cu no lo wordo libra di nan problema nan.

 

  1. E) FALTA DI INFORMACION

Hopi biaha e hoben ta wordo ofreci e droga sin cu e tin conocemento di su efectonan pa cu su curpa y su futuro. E bendedo of e amigo (a) cu ta uza y ta ofrece na otronan porta mes no sa, pero ta bon pa nos como mayornan ta bon informa tocante di e material di droga y su efectonan devastador pa nos por pasa e informacionnan aki pa nos yiunan of sernan keri.

CONSEHO DI FADA

Ta hopi importante pa mayor nan dedica e tempo necesario, un tempo di calidad, na nan yiu nan, no solamente concentrando ariba nan educacion pero tambe na nan crecemento emocional sano.

Hopi biaha mayor nan, tin di pone prioridad nan den bida y e desaroyo sano di un famia sigur ta un di e prioridad nan aki.

Loke nos no mester lubida como mayor nan ta cu loke nos sembra awe ta loke nos lo cosecha den futuro.

 

Pa mas informacion por tuma contacto cu FADA na telefonnan: 5832999-5839610, via fax nr. 5834501 of via nos website: fundacionantidroga.org

Tambe por tuma contacto cu nos via Facebook.

Nos ta situa na Campanastraat 5 na Tarabana/Dakota.

 

 

PREVENI TA MIHOR CU LAMENTA

 

 

13:30 to 16:30

F.A.D.A (Fundacion Anti Droga Aruba). Tel. (+297) 583-2999 / 583-9610