FETAL ALCOHOL SYNDROME
FADA - News

FETAL ALCOHOL SYNDROME

Nos pais conoce un supuesto cultura di bebemento cu ta wordo pasa di generacion pa generacion.

Nos por observa den medionan di comunicacion con uzo di alcohol y droga ta cobrando victimanan diariamente cu tur su furia.

Pero scondi tras di tur e sucesonan negativo aki ta tuma luga dramanan familiar caminda cu e mal uzo di alcohol ta laga un marca permanente atras.

E marca aki nos ta yama e: Fetal Alcohol Syndrome.

FETAL ALCOHOL SYNDROME

Kico ta e significado di e Fetal Alcoho Syndrome?

Fetal Alcohol Syndrome ta un serie di caracteristicanan di defectonan fisico y mental cu por desaroya den un foetus (baby den e barica) den asociacion cu nivelnan halto di consumo di alcohol durante embaraso.

Alcohol ta crusa e barera di e placenta y por stroba e crecemento of peso di e foetus.

Esaki por causa efectonan den e aspecto di e cara di e baby, daño na nervionan y structura di e celebro cu por resulta den problemanan psicologico y conducta problematico.

Esaki ta tuma luga specificamente den bida di e hende muhe cu ta uza alcohol den e periodo di embaraso.

 

ALGUN CARACTERISTICA DI FETAL ALCOHOL SYNDROME

-        Wowonan chikito

-        Lip ariba fini

-        Dificultad pa crece

-        Dificultad pa aumenta peso

-        Daño celebral

-        Craneo chikito

-        Retardo mental

-        Problemanan pa studia

-        Dificultad pa paga atencion

-        Poco dominio ariba impulsonan

-        Defectonan pa papia y memorisa

EFECTONAN SECUNDARIO DI FAS SYNDROME

-        Problemanan mental

-        Adiccion na droga

E Fetal Alcohol Syndrome ta solamente 1 di e tanto consecuencia nan cu abuso di alcohol por trece pa e curpa humano sin conta e consecuencianan pa cu e trabou, famia y sernan keri.

FADA ta recomenda dama hobennan y tambe damanan adulto cu ta sperando un baby pa no involucra nan mes cu consumo di alcohol.

E nacemento sano di e criatura aki ta den man di su mama, cu por brinda e yiu aki e oportunidad di por nace sano fisicamente y psicologicamente.

Den caso cu problema cu bebemento  di alcohol excesivo (adiccion) di bo mes persona of kisas di un ser keri, un familiar, por yama libremente na oficina di FADA na telefon 583-2999 of 583-9610 caminda bo por ricibi consehonan pa bringa e adiccion aki.

Por pasa personalmente tambe na nos oficina situa na Capanastraat 5 (Tarabana).

 

 PREVENI TA MIHOR CU LAMENTA

 

13:30 to 16:30

F.A.D.A (Fundacion Anti Droga Aruba). Tel. (+297) 583-2999 / 583-9610