Alcohol
FADA - Droga

Alcohol C2H5OH = Ethanol

Mundialmente Alcohol ta e droga mas uza y ta e droga cu ta mata mas hende rond mundo. Un di e  motibonan ta cu alcohol ta un droga legal, e ta facil pa haya y ta wordo bendi casi tur caminda y den mayoria di celebracion  alcohol ta wordo uza.

Alcohol puro ta un likido transparente, sin color, sin smaak. Ta produci alcohol dor di laga “yist” traha  riba alimentonan cu tin sucu aden manera: Batata of frutanan .  “yist” ta pone cu  sucu  ta cambia bira Alcohol.

Por ehempel:

Grano ta wordo uza pa traha cerbes.

Druif ta wordo uza pa traha biña.

Grano, sucu di caña, batata y diferente fruta ta wordo uza pa traha bebidanan cu porcentahe mas halto cu alcohol

Si alcohol wordo consumi moderadamente su efectonan negativo ta menos cu si e persona abusa di  alcohol.

Mal uzo di alcohol ta afecta diferente aspecto den bida di un persona:

Social : Comunicacion, actividadnan, famia, amistad, trabao.

Fisico: Daño na organonan interno y salud general.

Mental: Un desbalansa emocional

Ora un persona no por biba sin consumi bebida alcoholico diariamente, e ora nos ta categorisa e persona como alcoholico. Un persona adicto na alcohol ta bay cuminsa bira iritabel, soda y haña  mareo y tin hopi ansiedad.

A wordo cientificamente proba cu mas trempan un hoben cuminsa bebe bebida alcoholico,e chens pa bira un alcoholico/ adicto ta hopi grandi.

Yiunan cu ta bin di mayornan alcoholico tin posibilidad mas grandi di comberti den un persona alcoholico.

Mediconan ta desconseha pa hobennan  bou 18 aña bebe bebida alcoholico paso e hoben tin chens  grandi di wordo intoxica dor di alcohol y esaki por ta mortal.

Sintomanan di uzo

  • Comportacion ta cambia p.e.: relaha, iritabel, contento, sentimental, agresivo etc
  • Coordinacion ta bira menos
  • Cara ta bira cora y pupilanan ta bira grandi
  • Stoma ta bira y sacamento
  • Suf y no ta hopi presente mas
  • Respiracion y pulso di curason ta desbalansa.

Reaccion di e consumido di alcohol ta depende di cantidad, sorto di bebida, combinacion di bebida cu e persona ta inheri y tambe di su postura.

Consecuencianan a corto plaso

  • Uzado ta experencia hopi dolor di cabes, insomnio, biramento di cabes,
  • Sacamento ( wayaba).,
  • Bo ta bira agresivo, dor cu alcohol ta laga bo  ta intolerante y si sin bebe mes bo ta un persona cu no ta tolerante, bebida ta acelera             esaki,
  • Afecta  sentido di huicio, control riba bo mes, papiamento, oido y coordinacion,
  • Perde consciencia ( lubida tur cos, cay abou, lanta na un luga sin sa con bo a yega eynan.)
  • Gastritis, kimamento na stoma, dolor di bariga,
  • Intoxicacion (den caso di bebe demasiado),

Consecuencianan a largo plaso

  • Por haya atake di curason,
  • Presion halto,
  • Atake celebral,
  • Daño na pancreas,
  • Cancer na boca , garganta, pecho ,tripa , higra
  • Daño celebral, alcohol ta traha directamente riba celebro. Bo memoria ta bay atras.  (principalmente  e partinan cu ta pone un hende  rasona, plania y soluciona problema)  Esaki ta pio pa hobenan pa motibo cu nan ta den desaroyo.
  • Morto dor di intoxicacion
  • Bo ta haña korsakoff syndroom
  • Fetal alcohol syndroom. E syndroom aki ta ora e mama ta consumi alcohol durante su embaraso cu consecuencia cu e baby por nace cu defectonan fisico y mental .
  • Impotencia tanto riba hende homber y hende muhe.

Tipnan

  • Evita bebe y stuur
  • Si bo ta pensa di bebe laga otro hende stuur pa bo
  • Evita di bebe alcohol dilanti bo yiunan
  • Corda semper duna un bon ehempel.
  • Corda semper prevencion ta cuminsa na cas
  • Ora tin fiesta di mucha no pone alcohol na fiesta
  • Den caso di adiccion busca ayudo profesional mas lihe posibel

Pa mas informacion por tuma contacto cu FADA na telefon: 583-2999 of 583-9610.

Tambe por comunica via fax nr: 5834501, via fundacionantdroga.org  of via Facebook.

FADA ta situa na Campanastraat 5, Dakota (Tarabana).

PREVENI  MIHO CU LAMENTA

 

 

 

 

 

13:30 to 16:30

F.A.D.A (Fundacion Anti Droga Aruba). Tel. (+297) 583-2999 / 583-9610